Икос 1
Ангелов и человеков Творец и Создатель, времена и лета во своей власти положивый и судьбы человеков и народов устрояй, видя ваши покорность воле Божией, к Богу стремление высокое и чистоту голубиную, призва вас от славного венца служения начальства народа нашего – первоверховного княжения Земли Русской к подвигу исповедания Страстотерпцев Христовых, иже со ангельской кротостью и незлобием претерпели суть, души свои, яко краеугольный камень, иже безумнии непокоривии соплеменницы наша, не хотевшии Богу и властям, от Него поставленным, покоритися, отвергоша, в славное премудрое основание Святой Руси положив. Сего ради дивное устроение Церкви Русския и Страны нашея северныя собою явили суть. Мы же, дивясь Премудрости Божией, таковое нам велие чудо свершившей, восхваляем вас званиими сими:
Радуйтеся, от веков Царем Славы в основание Державы Российския предизбраннии!
Радуйтеся, до самого Страшного Суда Христова славнии о ней пред Богом ходатаи!
Радуйтеся, кровьми своими, яко царскою багряницею, Церковь Русскую украсившии!
Радуйтеся, славными страданиями и чудесами от мощей своих всю Землю Русскую родную освятившии!
Радуйтеся, единством своим у Пресвятыя Троицы нерушимое единство народов Русския Церкви являющии!
Радуйтеся, и нам, единокровным, всегда стяжати единство против врагов коварных вразумляющии!
Радуйтеся, единением у Престола Святыя Троицы врагов единения Руси Святыя обличающии!
Радуйтеся, и нам, меньшим братиям вашим, против козней врагов плотских и бесплотных единение обретати помогающии!
Радуйтеся, троице святая – первоверховнии князья и Христовы страстотерпцы Борисе, Глебе и Игоре!