О Великий Христов угодниче и преславный целебниче, великомученице Пантелеймоне! Душею на Небеси Престолу Божию предстояй и триипостасный Его славы наслаждайся, телом же и ликом святым на земли в Божественный храмех почиваяй и данною ти свыше благодатию различная чудеса источаяй, призри милостивным твоим оком на предстоящая люди, честней твоей иконе умильно молящияся и просящия от тебе целебные помощи и заступления: простри ко Господу Богу нашему теплыя твоя молитвы и испроси душам нашим оставление согрешений. Се бо мы, за беззакония наша не смеюще возвести очеса наша к высоте небесней, ниже вознести глас молебный к Его в Божестве непреступней славе, сердцем сокрушенным и духом смиренным тебе, ходатая милостива ко Владыце и молитвенника за ны, грешный, призываем, яко ты принял еси благодать от него недуги отгоняти и страсти исцеляти. Тебе убо просим: не презри нас, недостойных, молящихся тебе и твоея помощи требующих. Буди нам в печалях утешитель, в недузех лютых страждущим врач, напаствуемым скорый покровитель, очесем недугующим прозрения датель, ссущим и младенцем в скорбех готовяйших предстатель и исцелитель: исходатайствуй всем вся, яже ко спасению полезным, яко да твоими ко Господу Богу молитвами получивше благодать и милость, прославим всех благих Источника и Дароподателя Бога, Единаго и Троице Святей славимаго Отца и Сына и Святаго Духа ныне и присно и во веки веков. Аминь.